SI MOIN TÉ KA GADÉ LAN-MAIN-OU ???
(Serge RESTOG)
Novembre 1967
Si moin té ka gadé lan-main-ou,
Epi moin té ka dit-ou
<< Poutchi ou ni lan-main sale con-ça >>
<< Poutchi zon-gues-ou sale con-ça >>
<< Poutchi ou ka mangé zongues-ou con-ça >> ?
Ah! quitté moin gadé ligne dè vie-ou,
I longue, la vie-ou ké longue
Nous ké ni an pil temps pou
Ain-main nous.
Si moin té ka gadé lan-main-ou,
Epi moin té ka dit-ou
<<Ou ni douètt longue, lan-main ta là
Té pou tchimbé plime. >>
Non, moin pas ka ri,
Pas motché-ou di ça moin ka dit-ou-là-a,
Atten-ne, atten-ne,
Arrété bougé con ça,
Atten-ne,
Ou ka empêché moin oué signe ta là ou ni là-a,
An lè Mont de Saturne-là :
Cé an zétoile, oui, ça cé, an zétoile,
Moin pè !!!
Doudou, moin pè !!!
Saturne cé tré mauvé signe,
Fatalité.
Ou ké quitté moin ???
Dit moin, dit moin ???
Dit moin ou pé ké quitté moin,
Jiré ça, jiré ça na lè tête-ou,
Oh ! moin pè, moin pè !!!
Si moin té ka gadé lan-main-ou,
Est-ce ou ké crouè ça moin ké prédi-ou-là :
Bon bagaille, bel bagaille,
An la vie merveillé, an la vie meillè
An l'anmou éternel,
L'agent, l'agent an pil l'agent.
Si moin té ka gadé lan-main-ou,
Epi moin té ka dit-ou
Ouè, gadé,
Entre pouce-ou épi l'index-ou
Ligne de vie-ou vide épi fond,
Ou ké vive longtemps.
Vini, vini là ti brin, posé tête-ou là,
En-lè jambe moin, épi déten-ne cô-ou ti tac.
Chut ! pas rifisé,
Pé ti brin, moin pas lé ten-ne réplique.
Là, éten-ne cô-ou là con ça
Epi couté moin.
Si moin té ka gadé lan-main-ou...
© Serge RESTOG 1981
Loi du 11 mars 1957 n'autorisant aux termes des alinéas 2 et 3 de l'article 41, d'une part que les "copies ou reproductions strictement réservées à usage privé du copiste et non destiné à une utilisation collective" et, d'autre part, que les analyses et les courtes citations dans un but d'exemple faites sans le consentement de l'auteur ou des ayants-droits ou ayants-cause, est illicite (alinéa 1er article 4).
Cette représentation ou reproduction, par quelque procédé que ce soit, constituerait donc une contrefaçon sanctionnée par les articles 425 et suivants du Code Pénal.
Réécriture du texte dans la graphie la plus usitée à ce jour.
SI MWEN TÉ KA GADÉ LANMEN'W ???
(Serge RESTOG)
Si mwen té ka gadé lanmen'w,
Épi mwen té ka di'w
<< Poutji ou ni lanmen sal konsa >>
<< Poutji zong-ou sal konsa >>
<< Poutji ou ka manjé zong-ou konsa >> ?
Ah! kité mwen gadé lin-dè-vi'w,
I long, lavi'w ké long
Nou ké ni anpil tan pou
Enmen nou.
Si mwen té ka gadé lanmen'w,
Épi mwen té ka di'w
<<Ou ni dwet long, lanmen-tala
Té pou tjenbé plim. >>
Non, mwen pa ka ri,
Pa motjé'w di sa mwen ka di'w la a,
Atann, atann,
Arété boujé konsa,
Atann,
Ou ka anpéché mwen wè siy-tala ou ni la a,
Anlè Mont de Saturne-la :
Sé an zétwal, wi, sa sé, an zétwal,
Mwen pè !!!
Doudou, mwen pè !!!
Saturne sé tré mové siy,
Fatalité.
Ou ké kité mwen ???
Di mwen, di mwen ???
Di mwen ou pé ké kité mwen,
Jiré sa, jiré sa anlè tèt-ou,
Oh ! mwen pè, mwen pè !!!
Si mwen té ka gadé lanmen'w,
Es ou ké kwè sa mwen ké prédi'w la :
Bon bagay, bel bagay,
An lavi mervéyé, an lavi méyè
An lanmou éternel,
Lajan, lajan anpil lajan.
Si mwen té ka gadé lanmen'w,
Epi mwen té ka di'w
Wè, gadé,
Ant pous-ou épi lendex-ou
Liy-de-vi'w vid épi fon,
Ou ké viv lontan.
Vini, vini la tibren, pozé tet-ou la,
Anlè janm-mwen, épi détann kò'w titak.
Chut ! pa rifizé,
Pé tibren, mwen pa lé tann réplik.
La, étann kò'w la konsa
Epi kouté mwen.
Si mwen té ka gadé lanmen'w...