KANNAVAL TJÈ SOTÉ
(Serge RESTOG)
Février 1979
Mwen anrajé telman
Kont kòmwen menm,
Mwen ka santi
Mwen sé boulé kòmwen aprémidi-a,
Épi apré sa,
Mwen ka désann an kò kannaval-la
Tou boulé.
Mwen ka fè'y pwan lavol jòdi-a.
- Julo, julo, dé boul
- Julo, julo, dé boul
- Malpwòp pasé mwen
- Malpwòp
- Malpwòp pasé mwen
- Malpwòp
Mwen tou boulé,
Mwen kay asiz anlè kannaval-la.
Mwen tou boulé
é, sé sel manniè
Mwen pé fè an kannaval,
Boulé, boulé kon an sad.
- Bofè-a, bofè-a,
Yo pété lonba vaval !
- Bofè-a, bofè-a
é yo pété lonba vaval !
Si mwen pa té boulé,
Mwen pa té ké sa dansé,
Mwen pa té ké sa chanté,
Tonnè-di-dié !
Sa ka faché mwen,
Sa ka dégouté mwen.
Ou ja wè moun dansé
Epi bouden vid.
Ou ja wè moun dansé
Epi dan tèt yo, yo ka sonjé
- << Dimen, a ki lè yo di mwen vini wè
si'y ké ni lanboch; >>
Ou ja wè moun ka anmizé
Épi tjè soté.
Anmizman ka maché,
Lè lavi ka maché !
Anmizman ka maché,
Lè lavi bel !
Jòdi-a mwen ka désann kannaval-la
Tou boulé.
Mwen ka pété ren'y jòdi-a
Mwen di'w.
Si ou wè an bagay rivé mwen,
Yo ni ka fouté mwen adan an twou
Épi sé uit ti manmay-la
Mété yo lasistans.
- A Noléwo pa lévé lanmen si kwapo !
- Si'w lévé lanmen si kwapo
Ou kèy lévé lanmen si manman'w alò !
Chanté-a pa ka menm
Sòti andidan gòj-mwen.
© Serge RESTOG 1981
Loi du 11 mars 1957 n'autorisant aux termes des alinéas 2 et 3 de l'article 41, d'une part que les "copies ou reproductions strictement réservées à usage privé du copiste et non destiné à une utilisation collective" et, d'autre part, que les analyses et les courtes citations dans un but d'exemple faites sans le consentement de l'auteur ou des ayants-droits ou ayants-cause, est illicite (alinéa 1er article 4).
Cette représentation ou reproduction, par quelque procédé que ce soit, constituerait donc une contrefaçon sanctionnée par les articles 425 et suivants du Code Pénal.