Zanndoli suiv rat, i mò néyé.

Gran kozman, kouté sa !

(Serge RESTOG)

I koumansé fè nwè,

Mé, nou telman bien la, chè,

Ki mwen pòkò anvi fè limiè oswè'a.

Kité lannuit-la tonbé, kité nwè fet bien,

Epi, rété  asiz koté mwen. Annou kozé ti bren.

Annou kité tjè-nou palé adan nwèsè-a.

Annou kouté lannuit-la tonbé,

Mwen kwè, nou ni anlo palé pou nou palé.

Non, pé ti bren. Pa di ayen.

Ou pé pa sav ki manniè nou bien la, pa ka di ayen.

Kolé kòw anlè mwen ankò titak.

Ou ka zannzolé bò mwen la kon an taktak.

Ki manniè ou ka wont konsa,

I ka fè nwè, ki moun ki pé wè nou la.

Nou pa ka menm wè kònou.

Gwo lannuit-la ja la, ka fè nwè toupatou.

Ou sav, mwen ni pou mwen sa di'w dé mo.

Mwen sav ou ja ka divinen yo.

Tjè-mwen ka bat san rété.

Tann sa, ki manniè tjè-mwen ka déchennen

Lè mwen vini pou di'w sa.

Ou ka kouté mwen, bel ti négres-mwen ,

Es ou ka tann, sa mwen ka di'w la ?

Kolé kòw koté mwen bel ti kabres-mwen,

Ou sav, mwen osi ped lapawol,

Epi, sé ba'w tjè-mwen ka palé,

Manniè i ka bat lakadans-la kon an tanboudibas,

Sé ba'w i ka vwéyé pawol monté.

                                                               © Serge RESTOG 1999

Loi du 11 mars 1957 n'autorisant aux termes des alinéas 2 et 3 de l'article 41, d'une part que les "copies ou reproductions strictement réservées à usage privé du copiste et non destiné à une utilisation collective" et, d'autre part, que les analyses et les courtes citations dans un but d'exemple faites sans le consentement de l'auteur ou des ayants-droits ou ayants-cause, est illicite (alinéa 1er article 4).

Cette représentation ou reproduction, par quelque procédé que ce soit, constituerait donc une contrefaçon sanctionnée par les articles 425 et suivants du Code Pénal.