Maya té ba kayali malvant, magré sa, kayali ka manjé maya toujou.

Ri ba mwen

(Serge RESTOG)

Mwen trouvé tet ou tou drol,

Mwen trouvé fidji'w maré,

Maré kon kod nas maré

Apré siklòn pasé.

Maré kon lanmè maré

Twa jou avan, twa jou apré

Laplenn lin,

Maré kon zeb kabouya maré,

An mitan an kwasé kat chimen,

Pou fè an ti lopérasion mennen vini.

Mwen trouvé'w anrajé kon an tjou pip,

Anrajé kon an kochon lanwel yo senyen mal,

Epi ki pa lé mò pies.

Mwen di'w, bonjou !

Bonjou pou dé sou !

Sé apenn, si'w té pé kraché anlè mwen.

Sé apenn, si'w té pé réponn mwen, tjip !

Ha ! fout mwen kontan'w,

Fout mwen simié'w,

Lè'w ka ri ri'w la

Ki ka fè latè tranblé,

Ki ka fè lapli tonbé,

Ki ka fè solèy chofé,

Ki ka fè kok ponn zé,

Ki ka fè sèpan maché kalpat,

Ki ka fè tòti mété kouri atè,

Ki ka fè dé zié-mwen koulé dlo,

Dlo lajwa, lakontantman.

Ti fidji'w tou bel,

Ti fidji'w pli bel.

I kon ta, an ti inosan,

Kon ta, an ti asoukrel,

Epi an ti manniè pli dous,

An manniè toudous,

A la dous,

Dous, dous, dous.

Ri !

Ri ba mwen,

Doudou-a !

Ri !

                                                               ©  Serge RESTOG 1999

Loi du 11 mars 1957 n'autorisant aux termes des alinéas 2 et 3 de l'article 41, d'une part que les "copies ou reproductions strictement réservées à usage privé du copiste et non destiné à une utilisation collective" et, d'autre part, que les analyses et les courtes citations dans un but d'exemple faites sans le consentement de l'auteur ou des ayants-droits ou ayants-cause, est illicite (alinéa 1er article 4).

Cette représentation ou reproduction, par quelque procédé que ce soit, constituerait donc une contrefaçon sanctionnée par les articles 425 et suivants du Code Pénal.