Sa ki manjé zé, pa sav si tjou poul fè'y mal

Sa ki manjé zé, pa sav si tjou poul fè'y mal.

Sé nou sèl ki konnèt sa

(Serge RESTOG)

Dépi tan nou konnèt,

Nou ka wè.

Yonn ka gadé lòt.

Yonn ka palé ba lòt.

Zié-nou ka jwenn.

Zié-nou ja ka fè lanmou.

Nou sav dé lèspri-nou ka jwenn

Epi ka di yonnalot, bagay,

Bon bagay, bel bagay,

Bel ti pawol ki dous.

---------------------------

Mé, lanmou-tala tro gran,

Lanmou-tala tro bel ;

Pou nou sé fè'y ped

Tout valè'y, tout grandè'y,

Tout klas-li.

Lanmou-tala ké mò, jou

Nou ké mélé lachè-nou adan sa.

Lanmou-tala ké pouri,

Kon lachè-nou ka pouri,

Jou-a kò-nou ké

Mélanjé adan sa.

Mwen pa menm lé touché'w,

Mé, mwen anvi sa.

Mwen pa menm lé bo'w,

Mé, mwen anvi sa.

Mwen pa menm lé fè'w sa,

Mé, mwen anvi sa.

Mwen pa menm lé fè lanmou épi'w,

Mé, mwen anvi sa.

Jou nou ké fè sa,

Tout bel lanmou nou an

Ké pran anlot sans,

Anlot divini,

I ké fébli, i ké vini lad,

Kon tout lézot lanmou

Ki tounen an labitid,

An mouvman otomatik,

Yonn ka sipòté lot.

Mwen ka mandé Bondié lafos épi kouraj,

Pou lanmou-tala viv lontan,

Rété fò, rété gran, rété pi, rété klè, rété prop,

rété fré, rété vayan,

Pou'y pa janmen mò.

Pas, sé dan tèt-nou i yé,

Sé dan lèspri-nou i yé,

Pèsonn pa ka wè sa,

Pèsonn pa konnet sa,

Sé nou sel ki konnèt sa.

Sé nou sel ki konnet zafè-nou.

Loi du 11 mars 1957 n'autorisant aux termes des alinéas 2 et 3 de l'article 41, d'une part que les "copies ou reproductions strictement réservées à usage privé du copiste et non destiné à une utilisation collective" et, d'autre part, que les analyses et les courtes citations dans un but d'exemple faites sans le consentement de l'auteur ou des ayants-droits ou ayants-cause, est illicite (alinéa 1er article 4).

Cette représentation ou reproduction, par quelque procédé que ce soit, constituerait donc une contrefaçon sanctionnée par les articles 425 et suivants du Code Pénal.