Anba pié mango vè a 

---------------------

    ében, sé anba pié mango vè a nou ka jwenn pou palé anlè dènié match foutbol la, sa ki ka fet  adan lapolitik, adan kartié-a, an péyi a, anlè tout boul latè a.

    Sé an bel gro pié mango vè ki la, bò chimen-an. Lè nou ka pasé bò'y, nou, gran moun, timanmay, jenn, vet, mi,  avòté, an flè. Nou ka paré lapli, la. Nou ka paré soley, la. Nou ka manjé ti mòso, la. Nou ka fè an ti poz, la. Lè dé jwenn, anlòt vini, épi ankò anlot. Sé la pawol ka tonbé. Sé la ou ka konnet tout dènié milan ki fini sòti.

    Anba pié mango vè a, sé la lajistis ka ba dènié jijman'y. Sé la ou ka aprann konnet lavi. Sé la ou ka aprann konnet péyi-a, mes péyi-a, nivo péyi-a, valè péyi-a, nanan péyi-a, souch péyi-a.

    Péyi-a bien, mèsi. Péyi-a ka alé bien, mèsi, souplé manmay. Péyi-a ka palé jòdijou. Péyi-a pè palé ti bren mwens jòdi. Péyi-a ka palé di kò-y menm. Péyi-a ka gadé kò-y. Péyi-a ka goumen pou i vini sa i anvi vini adan gran ranboulzay lavi jòdijou, adan gran goumen an ki anlè boul latè a. Péyi-a ka réfléchi. Péyi-a ka matjé. é sé sa ki ka matjé nou ké mété anlè paj-tala. Nou ké mété tousa nou jwenn é nou touvé entérésan. Nou ka mandé zot vwéyé teks ba nou osi, pou nou rivé palé di tout bagay ki ka fet, ki pé fet, ki pou fet, ki andwa fet, ki pa pou fet, ki sé pé fet, ki pa té pou fet, ki té ja pou fet.

    Ki manniè pou zot fè si zot lé vwéyé dé mo kozé anlè paj-tala ? Zot ka annou vwéyé teks-zot anlè ladres-tala :

"kapistrel (arobase) sasi.fr"

Adan ki lang zot pé vwéyé sé teks zot la ?

 Zot pé vwéyé sé teks-la an anglé, an fransé, an kréyol, an panyol.

   Mèsi anpil.